استقالة حمار !!!!!!!!!!

طبعا زى ما وعدتكم بالقصيده ده
بتاعت استاذى الغالى وحبيب قلبى من الشعراء
الافاضل الشاعر حسن شتا

يوميات حمار
........................

حتى الحمار ليه موقف
حمار وجاء له مزاج يستقيل من الشغل
نهق بحرقه وقال ملعون ابو الذل
من طلعت الشمس للمغرب على ده الحال
وقلت الاكل يا عربجى جابتلى داء السل
مش ماشى
ومدد على الاسفلت فى الشارع وقال يا عربجى حتى ولا الاعدام
وان كان على شغلتك انا مستقيل منها
وان كان على لقمتك الله الغنى عنها
ون كان على البردعه ولا اللجام خدهم وادينى حريتى جاء وقت اعلان
مش ماشى
طول عمرى بجرى على مراتك وجوز عيال
لعمرى عصيتك ولا قلت انى مش شغال
بجرى عليهم وعامل حضرتك راجل
وانت اصيل فى الدناوة
ما تبطل استغلال
ايه شغلتك حضرتك ممكن تفهمنى
غير بس قولت شى حا وانك بتشتمنى
وكل خطوة تفرقع كربجين قدام
دنا لحم ياعربجى والضرب يئلمنى
مش ماشى يا عربجى
تيجى تحاسبنى واحاسبك يا ضلالى يا دون
وأقطع دراعى وأراهنك حتلاقيك مديون
جدك شرانى بنص جنيه سنة عشرين
وأبوك ورثنى وكان راجل فظيع مجنون
وأبوك هرا ضهرى بالنبوت
ومن عرق جتتى بنالكوا ست بيوت
جيت انت ورثتنى وأديك حتسيبنى لابنك بعد ما انت تموت
مش ماشى يا عربجى
انا عايز الف وأدور ونهق بحرية
لحا ولا شى
وأرمى اللجام وقطعه انا متولدتش بيه
صدقنى ياعربجى لو يوم بقيت انا عربجى وانت اتقلبت حمار
حتعيش معايا عيشه كلها بحبحه وهزار
نقسم الشغل والمعلوم بينى وبينك بالحق والمعلوم
مشوار تجر انت وانا مشوار
مش ماشى يا عربجى انا من شغلتك انا مستقيل
.......................................................................
وفكر انت بقى مين الحمار ومين العربجى
وهل هو فى اصلا دلوقتى حمير بتقول كده
ولا الحمير كلها ساكته .
................................................
وكده يبقى كله فى التمام والسلام ختام
وانتظروا الجديد والجديد مع اخوكم فى الله صلطح

وصلطح صلطح ياعم الحاج